Ég reyni yfirleitt að vera mættur með fyrri skipunum í vinnuna. Við opnum 9 og reyni ég yfirleitt að vera mættur hálftímanum fyrr til þess að fara yfir verkefnin sem bíða, Kaffi og sígó, renni síðan yfir linkana mína og lít í vefblöðin. Renni yfirleitt yfir fréttirnar í fljótheitum en staldra þó stundum við og kommenta með sjálfum mér á það sem ég hef lesið.
Reyni þá yfirleitt að vera gáfulegur og hnyttinn.

Innlent | mbl.is | 2.11.2005 | 07:14
Kona meiddist á fæti er sprengja sprakk undir bíl í nótt
Sprengja sprakk undir bíl í Skeifunni í Reykjavík um klukkan hálfþrjú í nótt. Kona sem átti leið þar hjá hlaut áverka á fæti við það að brot úr sprengjunni lentu í fæti hennar. Var hún flutt á sjúkrahús þar sem gert var að sárum hennar sem munu hafa verið minniháttar.

Sprengjusérfræðingur lögreglunnar rannsakaði vettvang en ekki eru frekari upplýsingar gefnar, að svo stöddu, um hvers kyns sprengjan var eða annað viðkomandi málinu. Bíllinn mun hafa skemmst mikið í sprengingunni og er ekki vitað hver stóð að baki henni.

Hverjar eru líkurnar á því að maður sé á gangi í Skeifunni kl. 2:30 á þriðjudagsnótt(????) og á sama tíma gerist sá fáheyrði atburður að bíl sé sprengdur í loft upp. Arnaldurinn í mér segir mér að konan hljóti að vera viðriðin málið.

Fréttablaðið, 02. Nóvember 2005 06:30
Mýsnar syngja ástarsöngva
Taugasérfræðingar við háskóla í Missouri hafa komist að því að karlkyns mýs syngja undurfagra söngva fyrir þær kvenkyns mýslur sem þeir hafa fellt hug til. Söngvarnir eru hins vegar á svo hárri tíðni að mannseyrað greinir þá ekki.

Vísindamennirnir létu mýsnar þefa af baðmull vættri þvagi sem innihélt kynörvandi ferómóna úr kvenkyns músum. Eftir að hafa hnusað af baðmullinni hófu mýsnar að syngja af öllum lífs og sálarkröftum. Hingað til hefur aðeins verið talið að hvalir, fuglar og apar syngju með þessum hætti en nú bætast mýs í hópinn. Hægt er að hlýða á sönginn á vefsíðu breska blaðsins Guardian.
Svo sem ekki "O sole mio" en stórmerkilegt engu að síður. Fannst þessar staðreyndir ekki síður merklegri í sama blaði.

Ég er hnyttinn ekki satt?